食物一入口，身體就開始拆。
消化系統嘅工作，唔係「將食物原封不動送入細胞」，而係將大餐拆成身體用得著嘅細原料，再交俾血液帶走。
所以先有呢句之後成個系列都會返覆講嘅話：
食咗，唔等於用到。
消化系統大致有邊啲部份
可以記一條簡單路線：
口 → 食道 → 胃 → 小腸 → 大腸 → 排出
另外有三個好重要嘅幫手：
- 肝
- 膽
- 胰
佢哋唔係食物必經之路，但負責提供酵素、膽汁，同處理吸收返嚟嘅物質。
口同食道：先拆細、再運送
口已經開始消化，唔係淨係咬。
- 牙齒負責切斷同磨碎
- 唾液令食物變濕、更容易吞
- 唾液入面亦有酵素，開始拆一部分醣類
食道就係通道，將食物送落胃。
呢段重點係「準備」，真正大量分解仲未開始。
日常影響：
- 食得太快、冇咬就吞
- 成日飲水送飯
- 壓力大、一食就想快啲完
呢啲都會令後面胃同腸更辛苦。
胃：負責攪拌同初步分解
胃好似一個攪拌缸。
- 分泌胃酸
- 將食物變成較稀嘅糜狀
- 開始拆蛋白質
胃唔係吸收營養嘅主要地方。
佢比較似「預先處理中心」：將大件變成後面小腸處理得到嘅狀態。
如果胃長期太滿、太急、太油、太晚食，常見感覺係頂、滯、反酸、易攰。
呢度仍然唔等於自己診斷有胃病，只係說明胃負擔大時，後面吸收會受影響。
小腸：真正吸收嘅主場
大部分營養，係喺小腸吸收。
- 醣類拆成單糖
- 蛋白質拆成氨基酸
- 脂肪拆成脂肪酸同甘油
- 再連同維他命、礦物質一齊入血
小腸內壁有好多皺摺同絨毛，目的係加大接觸面積，等身體有更多機會攞走原料。
所以「吸收好唔好」，好大程度睇呢度。
唔係 supplment 名字好聽就自動入到細胞。
肝、膽、胰：幕後加工廠
呢三個好容易被忽略，但其實好關鍵。
胰
分泌消化酵素，幫小腸拆醣、蛋白質同脂肪。
膽
儲存同釋放膽汁，幫脂肪乳化，令脂肪同脂溶性營養更容易被處理。
肝
接收小腸吸收返嚟嘅物質，再決定：
- 儲起
- 轉化
- 解毒
- 再交俾身體使用
可以咁理解：
小腸負責「收貨」，肝負責「分貨同加工」。
呢個就解釋到點解有人食得好、補得好，身體仍然未必即刻有感覺。
中間仲有加工同分配。
大腸：收回水分，處理剩餘
到大腸嗰陣，大部分營養已經被小腸攞走。
大腸主要做：
- 回收水分同部分電解質
- 讓腸道菌參與剩餘物質處理
- 形成糞便，準備排出
所以排便唔只係「清腸」咁簡單，亦係消化過程完成嘅最後一站。
太急、太慢、太乾、太稀，都係身體俾你嘅訊號，但同樣要小心，唔好見到一種情況就自己對號入座。
點解「食咗唔等於用到」
一舊食物要變成身體用得著嘅嘢，至少要過幾關：
- 咬得碎、吞得到
- 胃分解得到
- 酵素同膽汁配合得到
- 小腸吸收得到
- 肝處理得到
- 血液先至送到其他系統
任何一關慢咗，結果都可以係：
你有食，但細胞收到嘅唔多。
可以點樣先照顧消化系統
由細位開始就夠：
- 食慢啲，咬多幾口
- 唔好一邊工作一邊急住吞
- 晚餐唔好太貼瞓
- 太飽就暫停，唔使硬食完
- 留意自己食完係輕鬆，定係成日頂住
消化唔係靠嚇自己「排毒」，而係俾個系統有時間做自己嘅工。
如果長期胃痛、黑便、體重急降、吞嚥困難，應睇醫生，唔好靠網文自行處理。